النفاق بين التملق والمجاملة

21/07/2020 - 12:53:07

بقلم / محمد امين جاد

أخى القارىء مانراه فى هذه الايام غريب جدا كل واحد خدم جاره اوذهب مع مريض دخله المستشفى او كلم له مسؤول يقول خلاص أنا مترشح لمجلس الشيوخ أو مجلس الشعب أصل ليا شعبيه وهو مينفعش نخدم إلا لما نكون أعضاء بمجلس الشيوخ أو مجلس الشعب وأول كدبة يبدء بيها المرشح رشحت نفسى من أجلكم وبعد ماينجح مانشوفش خلقته إلا قبل الإنتخابات اللى بعديها وفى المناسبات والمأتم وتلاقيه آخر منجهة بفضلكم ( إرحموا أنفسكم شويه والنبى ) والله الدنيا دى زايله واللى عايز يخدم بيخدم موش محتاج يبقى عضو لافى مجلس الشيوخ ولا مجلس الشعب مصر بقه فيها ١٠٠ مليون واحد عايزين يترشحوا أمال فين الشعب اللى هتخدموه ولما الشعب كل واحد فيه شايف نفسه عضو مجلس شيوخ ولا عضو مجلس شعب يبقه كده الحمد لله مفيش مشاكل ومصر بخير فعلا والله إنتم محتاجين المستشار مرتضى منصور يقولكم جملة واحدة بس .... ؟! فاكرين كمال أبو عيطة طول حياته مناضل عمالى وكان بيبكى بدموع عشان العمال والغلابة له نضالات واضرابات عمالية ونقابية أشهرها اعتصام موظفى الضرائب العقارية أمام مجلس الوزراء في آخر عام 2007 ومطلع عام 2008 مطالب بمساواتهم بباقى موظفى الضرائب وأول مامسكوه وزير القوى العاملة كان اللى بيروح له من العمال والشعب بيطرده بره الوزارة ومدير مكتبه مفيش على لسانه إلا جملة واحدة معالى الوزير موش فاضى يقابل حد **
ولذلك اعرض عليك اخى المواطن بطاقة ترشيح مجلس الشيوخ القادم مبروك لقائمة ال ١٠٠ عضو المختارة عن طريق الاحزاب المختلفة وكل حزب واختياراتة والراي العام يحكم مستقبلا ولكن نحن امام اختيار ال ١٠٠ عضو فردى وسوف يكون امامك شخص محترم جدا تمام وقريبي او صديقي او جاري تمام وحاصل علي مؤهل علمي برضة تمام واخر عايش معانا وبيشاركنا المناسبات الاجتماعية تمام وشيخ عرب وبيصلح المتخاصمين تمام وراجل طيب وبيعمل الخيرتمام واخر عارف ربنا وبيراعيه في تعاملاته تمام ولكن هل تري ان تلك الصفات الجميلة المحترمة تصلح لاختيارة نائبا عنك في مجلس الشيوخ مجلس الخبرة وابداء الراي والمشورة مجلس المثقفين والعلماء هذة الصفات تصلح للصداقة للأخوة للنسب مثلا ياريت نفرق بين الحب والجيرة والنسب وابن بلدي وابن قريتي اولي واختار من يستحق طبقا لسيرتة الذاتية ومتطلبات المنصب من ستختارة سيكون نائبا عن الدائرة كلها لمدة ٥ سنوات وربنا يولي من يصلح ثم ان التملق هو تقرب الشخص إلى الناس ولاسيـــــما ذوي السلـطة والثروة كمدحهم بما ليس فيهم والتذلل لهم للحصول على هدف نفعي والدافع النفسي لنفاق التملق كما يذكر علماء النفس هو الخوف والطمع فالتملق النفسي والاجتماعي ينتشر بين الناس كالوباء في عصور الانحطاط وتملق أهل السلطان أخطر أنواع النفاق الاجتماعي لأن بأيديهم السلطة والقوة وتجعلهم أقرب للبطش والتجبر كما أنهم أسهل وأسرع الناس زلقا في فخاخ الكبر والبطر لذلك كان احتياجهم لعاقل ناضج أمين أشد من احتياجهم للهواء والماء لكن للأسف النفاق هو أحد الصفات التي تكون موجودة في فئة كبيرة من الناس والذين يكونوا منافقين أخلاقيًا أو اجتماعيًا ويقوم هؤلاء الناس بالحكم على الأشخاص الآخرين بشكل قاسي وبالمقابل لا يحكمون على انفسهم بنفس الطريقة او نفس القسوه ويقول الرسول صلى الله عليه وسلم في المنافقين: (تَجِدُونَ شَرَّ النَّاسِ ذَا الْوَجْهَيْنِ؛ الَّذِي يَأْتِي هَؤُلَاءِ بِوَجْهٍ، وَيَأْتِي هَؤُلَاءِ بِوَجْهٍ) يقولكم أيه تعالوا نفكر نختار مين فى مجلس الشيوخ تيجوا نفكر مع بعض ونختار حد مننا يكون صوت لينا نختار حد نطلبه يرد ميقفلش السكه فى وشنا نختار حد يقف مع الصنايعى الغلبان ونتلاقيه جنبنا نختار حد يتكلم مع التضامن الاجتماعى ويجيب حقنا نختار حد لو الصحه فى مشكله نطلبه يكون فى وسطنا نختار حد فى التعليم لو ابنى او بنتك فى مشكله يكون نصير لنا نختار حد مش بيخاف ويكون شخصيه قويه ولاى قيادى يقف قدامه يعمله حساب ومايخفش ولا يهاب يبقا لازم يكون اختيارنا لشخصيه تكون جنبنا وتجيب حقنا وتكون فى وسطنا والاهم أنه يخاف ربنا تفكتروا مين يكون ممثلنا فى مجلس الشيوخ *
والمضحك ان فى قرية مغتصبة طوال العمر للقرى المجاورة لها وعندما تفكر فى ان تدفع بنائب منها يخرج عليها من القرى والنجوع بترشيح كل من هب ودب عموما شبابها يقول نحن مصممين ولابد ان يكون لنا نصيب مثلكم واذا لم يكن فى هذه الدورة يكون فى الدورة القادمة وانسوا ان هذه القرية تكون مثل سوق العبور كل واحد يدخل وياخذ مايريد صحوة شبابها فوق كل اعتبار ولكن المضحك اننا نسمع عن اشخاص لم نعرفهم ولكنهم اتخذوا اساليب كيفية الترشيح ***
* فصل 5 جلبيات بلدي صوف غاليين بالقفاطين البيضة اللي تحتيهم وشال محترم
* وتروح أي عزا في الدايرة وتدخل من قدام حتي لو في قرايبك من هو أكبر منك سنا ومقاما
* وتروح أي فرح دعيت إليه أم لم تدعي وتسلم علي كل الفرح اهل العريس والعروسة والمدعويين
* تتصرف ولو حتي هاتستلف وتدبح عجل كل سنة وتوزعه علي الناس اللي ممكن تحشدلك أصوات
* تسمع عن أي صلح تروح تحشر نفسك في اللمسات الأخيرة وتقعد قدام
* تسمع عن أي ست غضبانة تروح لجوزها وتسمع منه وتاخد حد من أهله وتصالحهم
* تنزل يفط كتير في العيد ودخول رمضان وتحط صورتك وتهنئ الامة الاسلامية وفي الاعياد المسيحية تهنئ الاخوة الأقباط
* اوعي تقرا سياسة عشان مش هتفهم حاجه واذا حد من المواطنين سألك أي سؤال سياسي ترد بإجابة واحدة ربنا يصلح الحال تمشي مع التيار وتبقى أبن الحكومة
* تسمع عن اي مدرسة هاتتبني او اي شارع هيترصف تروح كاتب طلب وموديه الابنية التعليمية او مجلس المدينة وتدَّعي كذبا وزورا وبهتانا انك انت اللي عملته
* أي افتتاح لأي منشأة حكومية تروح وتحشر نفسك وتتصور
* أي مسجد هايتبني تروح وتتبرع عشان تحضر افتتاح المسجد كإنك إنت اللي بنيته
* أي فرصة للخطابة في أي مناسبة امسك الميكروفون وقول كلمتين اى كلام وبس
* تنتقد المستشفي بمناسبة ومن غير مناسبة هو انت عارف حاجة
* تصاحب الظباط وأمناء الشرطة عشان لو حد اتمسك تروح تطلعه من المركز
* استلف عربية من أى حد عشان لما تروح عزاء او فرح بقولوا عليك من الاكابر
* كل بلد تروحها تقوللهم ايه اللي ناقصكم ؟؟ قال يعني انت اللي ها تكمله
* اي حد بيتفزلك وبيسأل أسئلة كتيرة وصعبة صاحبه بسرعه وخد تليفونه وقوله انت عجبتني عشان مخك حلو عشان ينشغل بكلامك ويبطل يسأل ..
* وتصاحب طوب الارض وتقعد عالقهاوي وتلم شلة حواليك بحيث يكون ليك هيبة كدة وزيطة كدابة ودايما صوتك يبقي أعلي من كل الموجودين للفت النظر والانتباه و يا سلام بقي لو بتشرب شيشة كمان بتحس انك معلم وابن سوق وفاهم في كل حاجة وانت مش فاهم حاجة مش كده ولا أيــــــــه
ومن خلال ذلك يجب ان نتحدث اليوم عن اساسيات كيفية اختيار المرشح الصحيح في الانتخابات بعد ان وصل عدد المرشحين فى القليوبية الى اكثر من 61 مرشح دا كلام يارجاله س- هل تعلم ما معني ئائب بالبرلمان ومجلس الشيوخ ؟
ج- نائب في مجلس الشيوخ هو عضو اختارته دائره لتمثيلها في مجلس الشيوخ و توصيل صوت هذه الدائره و اهالي هذه الدائره الى قاعه مجلس الشيوخ و النائب له ثلاث وظائف اساسيه : 1- هى الغرفة الثانية للتشريع
2- هى توصيات ترفع لمجلس النواب المنوط به التشريع وسن القوانين
3- تطوير دائرته بالخدمات العامه و تطويرهابالمشاريع التي تحتاجها .
س- ما هي مواصفات الشخص اللى هيمثلني في المجلس ؟
ج- سؤاء كان اختيارك بنظام الفردي اوالقائمه فيجب ان تختار هذا الشخص وفق البرنامج الانتخابي الذي سوف يترشح من خلاله ولا يجب ان يكون اختيارك له تحت اي تمييز ديني او طائفي .
س- ما هي الاحتياطات في اختيار النائب ؟؟
* ان لا يكون اختيارك للنائب على اساس تميز ديني اولا يكون اختياركل نائب بسبب وعد منه للبحث لك عن وظيفه ( لأنها كلها وعود انتخابات فقط )
وان يكون شخص واعي و مثقف حتي يستيطع تمثيلك في المجلس ولا تختار مرشح يقوم برشوه الناس حتي ينتخبوه ولا تختار مرشح لايظهر الا في اوقات الانتخابات ولا تختار مرشح تراه بعينك يساعد الفقراء بالمال امام الناس ايام الانتخابات فكلها للدعاياالانتخابيه فقط ولا تختار مرشح لأنك تعمل لديه في شركته الخاصه وسوف يعطيك علاوه اذا انتخبته ولا تختار مرشح سبق ورشح نفسه ولم يقدم شيئا في البرلمان ولا تختار مرشح سبق وفاز بالرشوه في الانتخابات السابقه ولا تختار مرشح يسيرعلى حسب اهواء الناس فـ سابقا كان يهاجمهم و بعد الثوره تحول واصبح يتحدث باسم الحريه ( فهذا منافق ) فلا تختاره ولا تختار مرشح عليه احكام سابقه بالإختلاس وسرقه ونهب المال العام
( معآ نصنع الأفضل)( معآ نختار الأفضل)
=====================================


اسمك
ملاحظة: نرحب بكل مساحات الاختلاف في حدود الآداب العامة وأخلاقيات الحوار وضمن إطار الموضوع، ويرجى مراعاة الكتابة باللغة العربية مع حسن الصياغة وتجاوز الأخطاء النحوية والإملائية، التعليقات المنشورة لا تعبر عن رأي "الشرق الاوسط الاخبارية" الإلكتروني ولا تتحمل أي مسؤولية قانونية حيال ذلك، ويتحمل كاتبها مسؤولية النشر، وللإبلاغ عن أي تعليق مخالف يرجى الضغط على زر "التنبيه" أسفل كل تعليق.

اختارنا لك

الاكتر قراءة